Populær salsmesse

I helga kunne Bryggja Grendahus opne dørene for den 27. salsmessa.

Per Ole Lefdalsnes

Det har vore salsmesse på Bryggja årleg sidan 1996, bortsett frå i koronaåret. Messa har i alle år vore noko både utstillarar, publikum og arrangør ser fram til.

Stort apparat

Det er styret i grendahuset som står som arrangør av messa, og i alt er eit tjuetal personar i sving for at messa skal kunne gå knirkefritt både laurdag og søndag.

Styreleiar i Bryggja Grendahus, Marie Kristine Kroken, er svært nøgd med årets salsmesse. Ho opplyser at det er 23 utstillarar som betalar 250 kroner per dag for ei salsbu. Dei kjem både frå «nær og fjern» og frå Bryggja er det 4 med salsbu. Dei fleste kjem igjen år etter år, men Marie Kristine gler seg over at det i år er fleire nye. Ho reknar med ei nettoinntekt på 40–50.000 kroner dei to dagane.

I tillegg til leige av salsbu kjem inntekter frå inngangspengar, matsal og loddsal med om lag 10.000 kroner. Ein kan både få seg middag og nyte kaffi og kaker. Så ingen treng å gå svoltne heim frå grendahuset på Bryggja denne helga.

Mange kjem og for å ete klubb. Den vert servert med kålrot, pølse og bacon i midten. Som tilhøyr kan gjestane velje lett rømme, sukker eller sirup. Elles såg det ut til at handelen i salsbuene gjekk strykande. I buene finn ein alt frå sylteflesk til akvarellar.

Drift av grendahuset kostar

– Vi reknar med at rundt 300 vil finne vegen til grendahuset i løpet av helga, slår ei nøgd Marie Kristine fast.

Det går med ein god del pengar til drifta av grendahuset. No står utskifting av lysarmaturen i gymsalen for tur. Dessutan må huset målast utvendig snart. I koronaåret 2020 måtte dei tære på oppsparte midlar, og kom seg såleis bra gjennom covid-19 året. Matsalen og storsalen er pussa opp dei siste åra.