Sangen: Ved Maurstad Gamle Bru

VED MAURSTAD GAMLE BRU

Tekst: Rigmor Navekvien. Melodi: Arne Owesen

Eg høyrer stille susing frå ei tid som eingong var,
og foten min trør varsamt i dei gamle fotefar.
Der elva syng sin melodi med sorg og glede i,
og kjæler kringom Gamle-brua der ho renn forbi.

Her har ho stått frå gammal tid, med spenn så fast og trygt.
Den fine runde kvelvingen har kunstnarhender bygt.
Med tanken godt forankra i vår gamle folketru
vi skimtar der eit troll som nektar tramping på si bru.

Og fossegrimen dempar ned sin ville melodi,
han flyttar til ein stad der elva ikkje går så stri.
Ein kveldsvind kviskrar stilt igjennom kratt og gamle tre,
den smyg seg under brua, og vil gjerne vere med.

Det er som gode makter vil slå ring om brua vår,
som sig og blir til nedfalls etter kvart som åra går.
Kom, la oss verne Maurstad-bru og gjere alt vi kan,
og knyte saman ny og gammal tid med sterke band.

Rigmor Navekvien

Mange var på ymse vis med på å byggja oppatt kvelvingsbrua på Maurstad.
Brua fekk m.a. si eiga vise, skriven av Rigmor Navekvien til melodi av
Arne Owesen. Alfred Solibakke laga illustrasjon.